Komo partner orguyoso di Special Olympics Boneiru

Digicel ta deseá Special Olympics hopi eksito

KRALENDIJK, Boneiru - 19YUNI201: Un di e amistatnan mas signifikante ku Digicel a kuminsá tempu ku e negoshi a establesé su mes na Boneiru ta e relashon ku Special Olympics. Na tur okashon i unda ku ta posibel, Digicel ta para kla pa yuda e atletanan di Boneiru kumpli ku nan deseo i realisá nan soñonan.

E aña aki un di e eventonan di mas importante di e karera di kualkier atleta spesial na mundu ta tuma lugá, esta e enkuentro internashonal ku ta tuma na Gresia, Special Olympics.

Djabièrnè último Digicel a organisá un fiesta ku tema “You are the champions”,  pa animá e atletanan i ofresé nan un momento pa relahá promé ku nan biahe. E delegashon di Special Olympics a gosa masha hopi mes di un atardi hopi ameno huntu ku nan amigunan di Digicel.

Staf i personal di Digicel a perkurá pa tin un bunita bolo ku e lema “You are the champions” riba dje i algun regalo manera sèrbètè, tas i “clappers”, ku ta duna impreshon di un aplouso enorme.

Pero, e regalo mas great ku e delegashon a risibí tabata nan karchi di invitashon pa ta huéspet na un sena ku e CEO di Digicel Group Dennis O’Brien durante e weganan olímpiko spesial na Gresia. Sr. O’Brien ta un gran sostenedó di Special Olympics i un di e fanátikonan mas grandi di atletanan spesial.

Ademas Digicel a kontribuí na Special Olympics Boneiru pa medio di un kampaña di SMS ku nan a kondusí di mart pa mei, 2011 banda di nan donashon anual.

Ayera e atletanan a sali pa Gresia i representantenan di Digicel tabat’ei pa dispidí di nan. E atletanan Mercelino Josefa, Marion  Leonicia, Cherryl Cicilia, Kenneth Piar, Revelino Engelhart, Swinda Offerman i Margriet Anthonij a sali kompañá pa miembronan di un delegashon, inkluyendo nan entrenadónan i e direktornan nashonal  Arlene  Engelhart, Sylvio Semeleer, Lucia Coffie, Ruthsella Willems, Earon Rosario i Eugon Augusta.