“Esaki no ta e promé, ni e di dos, sino e di kuater bes ku nos ta para aki huntu ku Special Olympics di Boneiru” asina Jursi Marshall di Digicel Boneiru a bisa na momento di hasi un donashon na e organisashon di Special Olympics. E organisashon di Boneiru pa di 4 aña konsekutivo por konta ku un aporte di Digicel pa ku desaroyo i progreso di e atletanan special ku ta forma parti di Special Olympics. Ku e aporte aki e atletanan spesial di Boneiru por haña fondo pa por train i partisipá tantu lokalmente komo internashonalmente den kuadro di nan deporte preferí. “Nos semper ta duna bek na nos komunidat, pero mi mester atmití ku Special Olympics tin un lugá spesial den nos kurason”, segun e gerente general di Digicel Boneiru a sigurá. Durante un evento bon atendé pa invitadonan dilanti nan tienda prinsipal den Kaya Grandi, Digicel Boneiru a probechá di hasi nan donashon pa e aña aki, un chek di Naf. 25.000,00 pa e atletanan spesial di Special Olympics Bonaire. Kada atleta a risibí un tas ofisial di FIFA komo un regalu speshal di nan amigunan di Digicel. Mester bisa ku durante e evento, e invitadonan a konta ku presentashon di Foyan Boyz i Sti & Miles ku a pèrkurá pa entretené tur hende manera nan so por.