Digicel i famianan a disfrutá enorme di Feria di Famia

KRALENDIJK, Boneiru – 1 di yüni 2012: Djasabra último Digicel a organisá pa promé biaha e tremendo Feria di Famia GRÁTIS pa un i tur disfrutá di dje. Esaki a tuma lugá for di 10or di mainta pa 1or di atardi na Restorant El Mundo ku hopi aktividat pa tur e muchanan.

Muchanan a bula den bouncer, a partisipá na diferente wega dibertido, hunga den ballenbak i mas ku klaro a pinta nan kara miéntras ku Panchito Club a sòru pa entretené tur esnan presente. Pero no tabata muchanan so ku a sa di pasa prèt na e feria, mayornan tambe a partisipá na e vários weganan ku chèns pa gana tremendo premionan i a sa di probechá di e super oferta riba BlackBerry pa solamente $50, ku a bai manera pan kayente.

Alabes Digicel tambe a probechá di e okashon pa entregá un kantidat enorme di premionan na ganadornan di e fabuloso kampaña di ‘Turn me On and Win’.

"E dia tabata un eksitoso. Tur hende a sa di pasa dushi na e feria. Sigur si bo wak tur e karanan felis di e muchanan ku a kore di un skina p’e otro, riba e plenchi. Nos ta hopi satisfecho ku e resultado i nos ta sigur ku lo bin ku un ripitishon”, asina Christie Quarton a duna di konosé.

 END