DIGICEL BONEIRU TA DESPEDI I YAMA BONBINI NA 2 EMPLEADO EHEMPLAR

KRALENDIJK, Boneiru – 14 di yüni 2012: E famia di Digicel Boneiru, ku dia pa dia ta kresiendo tantu den usuario komo empleado, ta kontentu i tambe un poko tristu ku nan tin ku despedí di un ekselente kolega, pero alabes yama un otro bonbiní. Esaki ta nifiká ku Digicel Boneiru lo konosé un empleado nobo, ku ta kla pa enfrentá tur e retonan komo tambe e éksitonan di nan.

E ehekutivo di merkadeo, Christie Quarton lo inisiá un transishon nobo – kontinuá su estudio di master den eksterior. Christie Quarton no por bai sin ekspresá su sentimentunan di gratitut: “E tabata un honor i privilegio pa mi pa sirbi e komunidat di Boneiru i demostrá kiko tur nos tin aden. Mi ta gradisí tur hende ku mi a  traha kuné, ku a yudami i kolaborá ku mi durante mi trayektoria na Digicel Boneiru. E tabata un periodo for di lokual mi a  siña masha hopi mes, i di kual mi lo keda ku bunita rekuerdonan i e spiritu kaluroso di nos Bonerianonan. Manera  semper mi a bisa: Chikitu pero Potente”. No permití niun hende pone nos un banda, paso nos ta chikitu. Nos ta un tesoro i ningun kaminda na mundu NO tin niun lugá manera Boneiru. E ta úniko i nos tin ku balor’é. Un danki enorme na Digicel pa duna mi e oportunidat i e staf ku m’a siña konosé durante e tempu ku m’a pasa akinan. Nos speransa ta pa mantené nos konekshon ku e hendenan di Boneiru. I na e hendenan ku ta karga e marka di Digicel na haltu. Danki pa boso konfiansa.”

Irvinia Daantje, ku tabata e ehekutivo di relashonnan públiko di Digicel Kòrsou i Boneiru, lo asumí e puesto aki. P’e tambe esaki lo ta un desafio nobo, ya ku promé e tabata biaha bai Boneiru pa ehekutá algun trabou, pero awor e lo establesé einan pa un periodo indefiní. “Komo un ehekutivo di relashonnan públiko, mi a biaha hopi bes bai Bonaire pa diferente kampaña. Mi ta entusiasmá  pa sigui desaroyá nos merkado di Digicel den e komunidat di Boneiru. Tin hopi kambio ta tumando lugá na e momentunan aki na Digicel i mi ta ansioso pa e promoshonnan ku ta na kaminda, mas ku klaro kada bes mas grandi i mihó ainda. Sin lubidá riba e tremendo ofertanan i eventonan pa e komunidat” Irvinia a ekspresá ku un sonrisa riba su kara.

Den nòmber di henter Digicel Boneiru, nan ta yama bonbiní na Irvinia Daantje i ta sigur ku huntu lo sigui ku hopi proyekto grandi i úniko i tambe ta gradisí Christie pa su tremendo dedikashon i trabou ku el a hasi durante e periodo ku el a traha ku nan i ta dese’é tur klase di éksito den su estudio i spera di wak e pronto na Boneiru.